KANGEN BAPAK

Bapak, sliramu wis sowan marang Gusti

Nalika putrimu ngelak pitutur luhur

Iki donyane wis ajur mumur

Akeh manungsa sing urip nglantur angel diatur

Bapak, sliramu wis sumare ing alam kalanggengan

Nalika donyane kebak wisa

Kang sumrambah ngracuni para manungsa

Kamangka putrimu isih butuh tuladha

Bapak, sanajan ragamu wis muksa...

Nanging  ing pucuking wengi iki

Ana sakcuwil pepelingmu sing tansah tak eling eling...

Uga isih daksimpen ana cepiting ati..

Bapak, sliramu nate ngendika...

Yen manungsa pengin nggayuh mulya ndonya klawan akherat,

Mung siji kang kudu diugemi, yaiku saben-saben arep tumindak

Tansah eling lan nyandhing marang Gusti kang Akarya Jagad

Bapak, senajan ragamu wis sumare..

Nanging tuladhamu kanggo nggayuh suwarga tansah dak amalake..

*** Tansah dadya Cahya kang sumunar,

mrabani pepetenge jagad raya ya ndhukPian****